我鍾意睇書，鍾意寫故事，
仲好鍾意將其他人寫落去個故事入面。
我都鍾意講個故事出嚟，講畀其他人聽。
我而家喺屋企。我想講我個故事畀人聽。
我想搵細妹，講畀佢聽佢都喺我個故事入面㗎！
喺故事入面，細妹做咗兔仔。
我去細妹嗰間房搵佢。細妹喺佢張床度，佢瞓咗。
都係唔好嘈醒佢。
我想講我寫嘅故事畀人聽。
我想講畀媽媽同嫲嫲聽，好唔好呢？
我想同佢哋講，佢哋都喺我個故事入面㗎！
喺故事入面，媽媽係貓仔，嫲嫲係狗仔。
我去廚房搵媽媽同嫲嫲。
媽媽同嫲嫲整緊嘢食。佢哋都唔 得閒。
我走出屋企門口，想搵爸爸同爺爺。
佢哋都喺我個故事入面，我想講畀佢哋聽！
喺故事入面，爸爸係魚魚，爺爺係龜龜。
我去泊車嗰度搵爸爸同爺爺。
爸爸同爺爺整緊架車，佢哋都唔得閒。
我寫咗個故事，呢個故事好正。我想講畀人聽。
個個都唔得閒。我講畀邊個聽好？講畀你聽啦！
我寫信畀「冚唪唥粵文讀本」， 講個故事出嚟！
