夫思家姐講咗嘅說話
一日朝頭早，夫思嘅嫲嫲叫佢過嚟就話：「夫思，你帶住呢隻雞蛋去你爹哋媽咪嗰便啦！你家姐行婚禮，佢哋想幫佢做個大蛋糕。」
夫思帶住隻雞蛋出發，佢喺路上遇到兩個摘緊生果嘅男仔。其中一個男仔搶咗隻雞蛋，掟咗去一棵樹度，隻雞蛋就爛咗。
夫思叫咗出嚟：「你搞咩嘢呀？隻雞蛋係攞嚟做蛋糕嘅，仲係俾我家姐嘅結婚蛋糕。結婚冇蛋糕，我家姐將會講咩嘢說話呢？」
兩個男仔整蠱完夫思之後覺得好對佢唔住。其中一個男仔就話：「我哋冇辦法幫你做蛋糕，但係我哋呢度有條木棍，可以送俾你姐姐。」噉夫思就帶上咗條木棍，繼續上路。
夫思喺路上又碰到兩個起緊屋嘅工人。其中一個工人就問佢：「我哋可唔可以借你條木棍用一用呀？」但係條木棍唔係好實淨，仲斷埋添。
夫思叫咗出嚟：「你搞咩嘢呀？條木棍係摘生果嘅人送俾我嘅，因為佢哋打爛咗攞嚟做蛋糕嘅雞蛋。嗰個蛋糕係送俾我家姐行婚禮嘅禮物。而家雞蛋又冇，蛋糕又冇，連禮物都冇埋，噉我家姐將會講咩嘢說話呢？」
起屋工人覺得好對唔住夫思，因為佢哋整斷咗佢條木棍。其中一個工人就話：「我哋冇辦法幫你做蛋糕，但我呢度有啲茅草，可以送俾你姐姐。」噉夫思就帶上咗茅草，繼續上路。
喺路上，夫思遇到個農夫同佢隻乳牛。隻乳牛就話：「幾靚嘅茅草吖！我可唔可以試吓？」但係茅草太好味啦，乳牛一啖就全部都食晒啦！
夫思叫咗出嚟：「你搞咩嘢呀？嗰啲茅草係俾我家姐嘅禮物。起屋工人俾咗嗰啲茅草我，係因為佢哋整斷咗摘生果嘅人俾我嘅木棍。摘生果嘅人俾咗條木棍我，又係因為佢哋打爛咗攞嚟做蛋糕嘅雞蛋。個蛋糕係俾我家姐行婚禮嘅禮物。而家雞蛋又冇，蛋糕又冇，連禮物都冇埋，我家姐將會講咩嘢說話呢？」
乳牛好對唔住，因為佢太過自私啦。農夫就決定俾乳牛跟住夫思行，作為送俾佢家姐嘅禮物。噉夫思就帶住隻乳牛，繼續上路啦。
但係，到咗食晚飯嘅時候，隻乳牛走返咗農場，夫思亦都係途中蕩失路。佢好夜先至到家姐嘅婚禮度，嗰陣時啲客都已經喺度食緊飯囉。
夫思叫咗出嚟：「點算好呀？隻乳牛本來係農夫送俾我嘅禮物，因為乳牛食咗起屋工人俾我嘅茅草。起屋工人俾茅草我，係因為佢哋整斷咗摘生果嘅人俾我嘅木棍。摘生果嘅人俾咗條木棍我，係因為佢哋打爛咗攞嚟做蛋糕嘅雞蛋。嗰個蛋糕係俾我家姐行婚禮嘅禮物。而家雞蛋又冇，蛋糕又冇，連禮物都冇埋。」
夫思嘅家姐諗咗一陣，就話：「夫思，我嘅乖細佬，我唔志在有冇份禮物。我都唔介意有冇個蛋糕。我哋今日聚埋一齊，我就已經好開心啦。你快啲著埋飲衫，同我哋一齊慶祝啦！」於是乎夫思就照做喇。
This story is brought to you by the Global African Storybook Project, an effort to translate the stories of the African Storybook Project into all the languages of the world.
You can view the original story on the ASP website here
