雞乸同老鷹
好耐好耐之前，雞乸同老鷹係好朋友。佢哋同其他雀仔住喺一齊，相安無事，但係佢哋都唔識飛。
有一日，佢哋住嘅地方有大飢荒。老鷹成日要走好遠好遠先至可以搵到嘢食。噉佢返嚟嘅時候就癐拉拉啦。老鷹就話：「噉樣做嘢實在太癐啦，肯定有個更加慳力嘅辦法。」
雞乸瞓飽咗成晚，就諗到個好計。佢開始搵埋其他雀仔掉落嚟嘅羽毛，就話：「等我哋將呢啲羽毛都縫喺我哋身上啦，或者噉樣行路就唔使咁辛苦啦。」
成條村入面只得老鷹一個有針，所以佢第一個開始縫羽毛。佢整咗對非常之靚嘅翼俾自己，做完之後呢，就响雞乸頭上面飛嚟飛去。雞乸問老鷹借咗眼針過嚟，但係佢好快就厭咗縫紉工作。噉佢就將針頭留喺櫃桶度，跑咗去廚房煮飯俾細蚊仔食。
其他雀仔見到老鷹飛得又高又遠，非常之羨慕。佢哋問雞乸借咗眼針，噉樣佢哋就可以幫自己整對翼喇。過咗冇幾耐之後呢，其他雀仔亦都飛晒上天啦。
當最後一隻雀仔嚟還返眼針嘅時候，雞乸唔喺屋企。佢嘅細蚊仔攞走咗眼針，玩嚟玩去。佢哋玩厭嘅時候，就將針頭留低咗喺沙地度。
嗰日晏晝，老鷹返咗嚟，佢問雞乸要返自己嗰眼針，因為佢要修補啲鬆散嘅羽毛。雞乸喺櫃桶、廚房同後院搵佢，但係點都搵唔到眼針出嚟。
雞乸噅老鷹就話：「再俾一日時間我啦！聽日你就可以修補對翼，飛去搵嘢食啦。」老鷹就話：「好吖，就俾多日你。如果你仲搵唔返眼針嘅話，你就要俾你一個細蚊仔我作為補償。」
第二日，老鷹嚟咗，佢見到雞乸正喺沙地入面搲嚟搲去，但係都係搵唔返嗰眼針嚟。於是乎老鷹就由天上俯衝落嚟，捉咗隻小雞仔就飛走。由嗰日之後呢，無論老鷹幾時喺天上面出現呢，佢都會見到雞乸喺沙地度搵緊針頭。
當雞乸喺地下見到老鷹個影嘅時候呢，佢就會警告自己嘅細蚊仔：「快啲匿埋吖！唔好响呢個空曠嘅地方度。」班細蚊仔就會答佢話：「我哋先至冇咁傻啦，我哋會走㗎。」
This story is brought to you by the Global African Storybook Project, an effort to translate the stories of the African Storybook Project into all the languages of the world.
You can view the original story on the ASP website here
