Granma banana dem
Granma gyaadn did nais-nais, fol a sogm, milet, an kasaava. Bot di bes a did di banana dem. Alduo Granmaa did av nof gran-pikni, mi di nuo anda di kwaiyat se mi a did ar fievarit. Shi mek mi kom a ar yaad aal di taim. Shi tel mi likl siikrit tingz. Bot shi did av wan siikrit we shi no tel mi: which paat shi mek ar banana dem raip.
Wan die mi si wahn big schraa baaskit inna di son outsaid a Granmaa ous. Wen mi aks ar se a we it fa, di onggl ansa mi get a did, "a mi majik baaskit." Said a di baaskit, a di nof banana liif we Granmaa ton uova evritaim. Mi did wel waahn nuo a wa. "We di liif dem fa, Granmaa?" mi aks ar se. Di onggl ansa mi get a did, "Dem a mi majik liif dem."
It did intrestin fi wach Granmaa, di banana dem, di banana liif dem an di big schraa baaskit. Bot Granmaa sen mi go tu mi mada fi go du sopm. "Granmaa, du, mek mi wach we yu a go mek..."No bi aadiez pikni, du we mi tel yu fi du," shi se siiros. Mi ron go.
Wen mi kom bak, Granmaa did a siddong outsaid bot sho neva av no baaskit ar no banana. "Granmaa, which paat di baaskit de, we aal a di banana dem de, an we..." Bot di onggl ansa mi get a did, "dem de inna mi majik plies." Mi did disapaintid!
Tuu die afta dat, Granmaa sen mi inna ar bedruum fi ar waakin stik. Az suuhn az mi uopm di duor, wahn schrang raip banana smel lik mi. Pan di insaid a di ruum a di Granmaa majik schraa baaskit. It did wel aid wid wahn uol blangkit. Mi lif it op an tek iihn di nais-nais smel.
Granmaa vais fraitn mi wen shi kaal mi, "We yu a du? Ori op an bring mi stik kom." Mi ori op an kom out wid ar waakin stik. "We yu a smail bout?" Granmaa aks se. A wen shi aks mi riyalaiz se mi stil did a smail bout ou mi fain out ar majik plies.
Di neks die wen Granmaa kom vizit mi mada, mi buolt go a ar yaad fi chek di banana agen. Wahn wel raip bonch did de de. Afta mi kova di baaskit agen, mi go biyain a di ous an it wan kwik-kwik. A did di swiitis banana mi eva ties.
Di neks die, wen Granmaa did inna di gyaadn a pik vegitebl, mi sniik go iihn an luk pan di banana dem. Nieli aal a dem raip. Mi kudn elp bot fi tek a bonch a fuor a dem. Az mi a tiptuo go a di duor, mi ier Granmaa a kaaf outsaid. Mi bieli manij fi aid di banana dem anda mi frak an waak paas ar.
Di neks die a did maakit die. Granmaa wiek op orli. Shi alwiez kyari raip banana an kasaava go sel a di maakit. Mi neva ori op fi go luk fi ar da die de. Bot mi kudn avaid ar fi lang.
Lieta inna di iivnin mi mada an faada kaal mi, an Granmaa. Mi did nuo a fi wa. Da nait de az mi lie dong fi sliip, mi nuo se mi kudn tiif agen, not fram granmaa, not fram mi pierens an fi shuor not fram nobadi els.
This story is brought to you by the Global African Storybook Project, an effort to translate the stories of the African Storybook Project into all the languages of the world.
You can view the original story on the ASP website here
