星期日，文仔媽媽買咗件新雨褸畀佢。
件雨褸橙紅色，好靚，文仔好想着住佢。
媽媽話：「阿仔，雨褸淨係落雨嗰陣先着㗎咋！」
星期一，天氣好好，太陽好曬。啲花都開得好靚。
文仔問媽媽：「今日會唔會落雨啊？」
媽媽話：「應該唔會喇。」
星期二，個天好藍，淨係得一嚿白雲。
文仔唔開心，佢諗：「今日一定冇雨落喇。」
星期三，天氣好熱，個太陽非常曬，犀利過之前。
文仔想喺屋企入面着件雨褸，點知熱到出晒汗。
文仔好唔鍾意，佢問：「點解仲未落雨㗎？」
媽媽都答佢唔到。
星期四，天空上面有好多嚿雲。
文仔攞住件雨褸，走出出面，喺公園等落雨。
不過，孔雀先生同佢講：
「啲雲咁高咁白，今日唔會落雨㗎！」
星期五，啲雲開始變黑喇。
文仔又攞住件雨褸，走去公園度等落雨。
孔雀先生話：「你咁想落雨，我幫你跳隻求雨舞啦！」
星期六，個天空好嘈：「嘭！」
發生咩事呢？係行雷啊！
文仔好開心，佢問：「係咪好快就會落雨喇？」
青蛙哥哥答佢：「係啊，好快就會落雨㗎喇！」
最後，個天真係落雨喇！
文仔同青蛙哥哥都好開心，佢哋喺雨入面跳舞。
不過文仔係咪唔記得咗啲嘢呢？
呢個時候，媽媽大聲叫：「文仔，你件雨褸啊！」
