我成日都出去出面。出面日日都有唔同嘅天氣。
今日係星期日，天氣好好，有太陽，有海風。
一路食雪糕，一路慢慢行，呢種感覺好正。
今日係星期一。太陽公公好勤力，佢曬到條街好熱。
佢太勤力喇，我坐喺樹下面，都出晒汗。
連棵大樹都畀佢曬到就嚟枯乾喇！
今日係星期二，出面吹緊大風。
啲風吹到大樹都企唔直。我都爭啲跌親。
我要用手撳實條裙，唔好畀啲風吹走。
今日係星期三，天空上面有好多雲。
啲雲黑蚊蚊，睇嚟好似想落雨噉。
我睇唔到個太陽，有啲唔開心。
今日係星期四，天氣好凍。
我件衫好短，凍到我係噉震。
我應該要着多件衫，令自己唔好凍親。
今日係星期五。落咗成日雨。
啲雨喺個天空度落落嚟。
唔知天空上面係咪有人喊緊？
今日係星期六，天空好多黑雲，仲行雷閃電。
啲雷聲好嘈，搞到我對耳仔好辛苦。
我要返入屋企喇！畀雷打中會受傷㗎！
今日又係星期日喇！我好開心。
知唔知點解我咁開心？因為我見到彩虹啊！
彩虹有好多顏色，有紅、橙、黃、綠、青、藍、紫，真係好靚啊！
