呢度住咗好多動物。佢係隻驢。佢個名叫阿高。
阿高好鍾意瞓覺。佢成日瞓到好晏都唔起身。
其他動物食早餐嗰陣，阿高仲瞓緊。
佢成日都冇早餐食，啲早餐畀其他動物食晒。
今日阿高又冇早餐食喇。佢覺得好肚餓，好唔開心。
住喺隔籬嘅牛牛問佢：「點解你咁唔開心嘅？」
阿高答佢：「我冇食早餐，好肚餓啊！」
牛牛話：「不如聽日我叫醒你食早餐吖！」
阿高話：「好啊！唔該你！」
到咗第二日，牛牛都係叫唔醒阿高。
到咗晏晝，阿高去到海邊，佢要送貨畀狗狗。
狗狗見到阿高，問佢：「點解你咁唔開心嘅？」
阿高答佢：「我已經兩日冇食早餐喇！」
狗狗話：「不如聽日我叫你起身，一齊食早餐吖！」
阿高話：「好啊！唔該你！」
到咗第二朝，狗狗都係叫唔醒阿高。
今日，阿高一樣冇早餐食。佢冇晒力噉瞓喺啲草度。
雞先生行過，見到阿高，問佢：「點解你睇落咁攰嘅？」
阿高答佢：「我三日冇食早餐喇，我好唔開心！」
雞先生話：「聽朝等我叫醒你啦！我一定可以嘅！」
阿高話：「好啊！唔該你！」
第二朝，雞先生好大聲叫，都係叫唔醒阿高。
阿高走去啲樹度，佢見到烏鴉仔。
烏鴉仔講緊故事畀大家聽。啲聲好大。
「烏鴉仔，不如你聽朝叫醒我食早餐吖！
我四日冇食早餐喇！」阿高噉同烏鴉仔講。
烏鴉仔答佢：「好啊！包喺我身上啦！」
到咗第二朝，烏鴉仔都係叫唔醒阿高。
其他動物點叫醒佢，阿高都係醒唔到。佢好唔開心。
第二日朝早，其他動物開始食早餐喇，阿高仲瞓緊。
呢個時候，有隻烏蠅飛落阿高個鼻度。
「乞……嚏！」阿高打咗個大乞嚏。
阿高醒咗喇！佢坐起身，問：「我係點醒㗎？」
烏蠅答佢：「我叫醒你㗎！你想唔想我朝朝都噉樣叫醒你啊？」
「好啊！」阿高答佢。「係你先叫醒到我咋！唔該你啊！」
烏蠅話：「唔使客氣！噉我哋食早餐啦！」
