今日下晝，我同我個仔都着咗新衫同新褲，
一齊出去玩。
我哋搭船過海，天氣好好，
海上面有太陽，又有少少雲，天空好靚。
跟住，我哋搭巴士去沙灘。
我幫阿仔除鞋，先知道佢兩隻襪唔一樣。
佢真係好叻仔，喺沙上面畫咗一隻貓同兩支花，
又用沙砌咗一間屋仔。
我話：「咁細間？
爸爸、媽媽同你，三個人住一間好大嘅屋，好唔好啊？」
玩到七點鐘，月亮出嚟，一樣好靚。
我哋肚餓，返屋企，日日都係噉就好喇。
我有好多嘢想同個仔做，同佢食飯，同佢去公園玩，
又有唔少嘢想幫個仔做，幫佢沖涼，唱歌畀佢聽。
轉天氣，我會問佢凍唔凍？熱唔熱？
佢覺得凍，我會幫佢着多件衫，着多條褲。
一個好爸爸應該要明白個仔，
明白佢諗咩，知道佢鍾意咩，唔好亂估。
呢啲嘢，唔難做，但係想做得好，唔易㗎。
