我今年四歲，讀K2。
我好多嘢諗，因為我有好多嘢唔明。
好似今日上晝噉，爸爸媽媽同我出去玩。
我哋首先搭地鐵，我唔鍾意；
今日晏晝爸爸媽媽同我去一個地方睇動物，
嗰度有汪汪叫嘅狗仔，我唔鍾意；
有喵喵叫嘅貓仔，我唔鍾意；
有喺籠裏面跑嘅倉鼠，我唔鍾意；
有食緊草嘅兔仔，我唔鍾意；
有游緊水嘅魚仔，我唔鍾意；
有唔喐嘅龜仔，我唔鍾意；
爸爸媽媽問我鍾意乜嘢，
我話呢啲我全部唔鍾意，我鍾意恐龍。
我問爸爸媽媽點解唔帶我睇恐龍，
佢哋話呢個世界再冇恐龍，我唔明。
我諗嚟諗去諗咗成日都唔明，
不過我鍾意諗嘢，應該有日會明白嘅！
