今日係星期日。
我拎住我部相機，搭咗巴士去淺水灣。
佢喺香港島，係一個好多人識嘅沙灘。
我之前搵過佢嘅相，嗰度好靚㗎，我好鍾意，
我想去嗰度好耐㗎喇。
我住喺上環，搭巴士要一個鐘。
我朝早九點鐘出門口，十點鐘去到。
今日天氣好好，少少熱，有風嗰陣，都幾舒服。
天空有太陽，冇乜雲，好藍，好靚。
我用相機影咗今日第一張相。
嗰度又有好多小朋友，
我見到有一啲女仔玩沙，有一啲男仔玩水。
有一個女仔問：「你估水入面有冇魚？」
佢個朋友仔答佢：「我唔知！我淨係知海入面冇雀仔。」
我又聽到有人唱歌，我聽唔明佢唱緊乜嘢。
佢唱得好好聽。
「哎吔！」我突然聽到一個男仔叫——佢跌親啊。
唔知道佢痛唔痛呢？我見佢冇喊，好叻噉企咗起身。
佢媽媽跑去問佢：「你有冇事啊？」
個男仔大聲噉答：「冇事！」
「我好鍾意沙灘，我想日日都嚟玩啊！」
「噉樣，好啦，我哋聽日再嚟玩吖。」「好嘢！」
佢哋喺度笑，我都喺度笑，然後幫佢哋影咗一張相。
