偉偉由動物園返嚟，話想喺屋企養隻恐龍。
媽咪話：「No，No。屋企呢度咁細，又邊度有地方養佢。」
偉偉聽完唔開心，繼續玩佢嘅車車。
偉偉爸爸同媽咪成日都要返工，得阿婆陪佢，
阿婆會朝頭早帶偉偉落公園玩。
去到樓下，有一架金色巴士停咗喺度。
有人叫偉偉：「上嚟啦！」於是佢就上咗去。
點知道一睇，個司機原來係一隻有彩虹色嘅恐龍。
入面原來已經有紫色嘅兔仔、淺藍色嘅豬仔、銀色嘅烏龜同粉紅色嘅老鼠仔坐喺度。
偉偉同大家講：「各位早晨！」
坐低落嚟，架巴士開始喐，
啲花花、大樹、大海、沙灘、屋仔同車仔向後面消失，
前面又出現咗太陽同雀仔。
偉偉由窗望出出面，原來架巴士已經飛咗上天空，
佢哋同架巴士喺雲同雲中間飛行。
偉偉一邊大叫一邊拍手：「好嘢！」
車上面嘅朋友仔由車外面拎咗啲食物出嚟。有啲乜嘢呢？
紫色兔仔講：「我有大樹糖糖！」
淺藍色豬仔講：「我有屋仔包包！」
銀色龜仔講：「我有花花菜菜！」
粉紅老鼠仔講：「我有大海汽水！」
之後佢哋叫偉偉食咗好多嘢，
偉偉好飽，點知佢哋繼續要偉偉食。
偉偉 大叫：「夠喇夠喇！」
點知一叫，架巴士撞咗落嚿雲度，
偉偉跌咗落彩虹滑梯，滑咗落去……
「哎吔！救命！」佢最後醒咗，
手上仲拎住媽咪買嘅彩虹恐龍公仔，
原來佢一直喺自己張牀，發咗個夢。
