ǃKhare iri khaoǃgâ kha ge kai faia hais tawa ge sī. Ngedeb ge ǃhaeǃhaebese haiǁnâugu ǃnâ ra urimâ. ǁÎb ge ǀgui ǁnâub ai ǂnû tsî Gingileba ǃoa danasa ra ǀhōǂui, iseb ra mî, “Nē i ge a! Nēsi ǀkhī re! Tare-ets ra ǀhaweba?” Gingileb ge ǀGuis khami ī ǁhabu-e hais ǃnākaba xu mû tama, xaeb ge ǁîba Ngedeb ra ǂgom ǃgâ.
Ob ge Gingileba ǁîb di ǁkhaba hais ǃnāka ra ǁgui, ǂkhari ǀaeroga ǀhaoǀhao tsî ǂkhari ǀaerosa ra khau. ǀAes ge ǃgâise a khau, ob ge gaxu ǂnâsa haiba ǀAes di ǁaegu ǃnâ ra ǃkhāǂgā. Nē haib ge ǃgōsase a ǂansa khauheb ra ob ǀgaisa lana ra
kuru ti. ǁÎb ge ǃnāpaxu hais ai ra ǂharo tsoatsoa, khau tama ǀkhāb haib diba ǁgûn ǀkha nâmâi hâse.
ǀAeǁaeb ge ǃhabugu ra summm ǀgaub ra ǁnâu. ǁÎgu ge hais ǃnâ ǂnôa āba xu ra ǂgâ ka ǂoa - ǃhabu omma xu. Gingileb ge ǃhabu ommab ge ǀgū o khau ra ǀkhāb haib diba ǁnāpa ra ǃkhāǂgā. ǃHabugu ge ǁaixa hâse ra ǁkhana ǂoaxa. ǁÎgu ge ra ǁkhanabē, ǀani xa gu ǃgâibahe tama xui-ao - xawegu aibe Gingileba tsûgase
ǃkhātoa tsî!
ǃHabugu ge ǂoatoa, ob ge Gingileba ǁîb di ǃomma ǃhabu-oms ǃnâ ǀhōǂgā tsî ǃomsǀoase ǃgom daniǂgoaba ra ūǂui, kausa ǃkhū hâ danib hîa ǃuri goaba ra ǂnâba. ǁÎb ge ǃamkuse daniǂgoaba ǁîb ǃhōb aib tani hâ ǁgarub ǃnâ ra ǂgā, tsî haisa xu ra ǁgôaxa.
Ngedeb ge ǂhīnase Gingileb ra dī xūn hoa a ra kō. ǁÎb ge ge ǃâubasen hâ i Gingileb kausa daniǃâsa daniǃkhōdao-aoba nî mā gangans di ǁgauǁgaus ase ti. Ngedeb ge ǁnâub a xu ǁnâub ǁga ra uriǁgôa haisa xu ǃhūb aib nî sīs kōse. ǀUnilams aib ge Gingileba haisa xu ra ǁgôaxa. Ngedeb ge axab xōǀkhā ǂnôa ǀuis ai ǁîb di mātawasa ǃâuǂnû hâ.
Xaweb ge Gingileba ǀaesa ǀari, tsî ǁîb di ǁkhaba ūkhâi tsî anib ǀkha ǁae tamase oms ǁga ra ǃgû. Anib ge ǁaixa hâse, “Vik-torr! Vik-torrr!” ti ra ǃau. Gingileb ge ǁūse mâ tsî sîba kō tsî ǃgarise ra âi. “Dani-ets ra ǂhâba, ǂhâbats ra, ti hōre? Ha! Tita ge hoa sîsenni go dī tsî ǀguri hoa ǃkhāde go hō. Tare-i ǃaroma ta sats ǀkha nî ǀgoragu?” Ti mî tsîb ge ge ǃgûbē. Ngedeb ge kaise ge ǁaixa! Nē ǀgau tamab ǁîb nî hâ ūheba! ǁÎb xa nî ǀkhaohe.
ǀGui tsē, wekhega ǃkharu hâse ge Gingileba ǁkhaba Ngedeb di ǃauba ra ǁnâu. ǁÎb ge ǁkhoaxa Dani-ets ra ǂâihō tsî turaxase ǁkhaba aniba ra
sao-ai. Gaxu ǁaeba Gingileba ǃgarob di ǂnaob kōse nana hâs khaoǃgâ ge Ngedeb kaiǃgâ ǁkhūhais tawa ra mâ. “Ahh,” tib ge Gingileba ra ǂâi. “ǃHabu-oms ge nē hais ǃnâ hâ.” ǁÎb ge ǃHaese ǂkhai ǀaerosa ra khau tsî hais ai ra ǂharo, ǀan ra haiba ǁgûgu ǀkha nâ hâse. Ngedeb ge ǂnû tsî ra kō.
Gingileb ge ǃaruǀî ra ǂoa ǂhâ rase tare-i xa ǃhabugu ǀōba ǁnâu tama ǃkhaisa. “Tsâpes kom ǃhabu-omsa ǃgame hais ǃnâ ǂnôa o,” tib ge ǁîb ǃnâ ra ǂâi. ǁÎb ge noxopa ǀnî ǁnâub ǃoa ra ǂgaekhâisen. Xaweb ge ǃhabu-oms ǃâs ǃnâ ǂhûiseb ǀkha ra ǃomgu. ǂHûiseb ge ǁîb di ǂomsa xu ǂhanihes xa kaise ra ǁaixa. ǁÎb ge mûra ra ǂōǂō, tsî amǃnâba khora hîa kaiǃgâ tsî kaise ǀā ǁgûga ra ǁgauba.
ǂHûiseb xa nî xorahes aiǃâ ge Gingileba ǃHaese haisa xu ra ǁgôaxa. ǃNoaǃnā tsîb ge ǀgui ǁnâuba dasā tsî tsûsase ǃhūb ai ra ǁnā tsî ǂaisa ra ǁkhuri. ǁÎb ge ǁkhā as kōse ǃhaese ra ǀībē. ǁÎb ǃGâi a ǃoab ge ǂhûiseb noxopa ǂoms ǃnâ ge hâ i tsî ge sauru tama ge i. Ngedeb, Daniǃkhōdao-aob ge ǁîb di ǀkhaoba ge hō. Tsî Gingileb ge ǁîb di ǁkhāǁkhāsa ge hō.
Tsî ǁnāti, Gingileb di ôasan Ngedeb di ǂhôas xa ra ǁnâu on ge kai ǃgôasiba ǁnā ǂkhari aniroba ūba hâ. Dani-en ra xoa ǁaeb hoaban ge hoa xa kai ǃâsa daniǃkhōdao-aoba ra ǃgauba!
