Likande le kila Ngede, yena Njolo ni mutangana yatimana yabizwa Gingile. Zazi leliñwi Gingile anaile kwa kuzuma, autwa pizo ya Ngede. Mwahanu ya Gingile sekukala kukoloba kabakala kunahana linonsi. Kihayema ni kuteeleza ka tokomelo, kubatisisa konji habona nyunywani mwa mitai fahalimu a toho yahae. “Kiyo-kiyo-kiyo,” Nyunywani ya lila, inze ifufela kwa kota yetatama, ni yetatama. “Kiyo, kiyo, kiyo,” yabiza, inge iyemanga nako ni nako kuikolwisisa kuli Gingile wailatelela.
Hase kufitile nakonyana, sebafita fa kota yetuna-tuna ya mubuyu. Ngede atulaka-tulaka ka makatakata kwa mitai. Saina fa mutai ulimuñwi ni kuotololela toho yahae ku Gingile inge yabata kumubulela kuli, “Kiye! Taha cwale! Kiñi sesi kuliyehisa?” Nekusina limuka zana boni Gingile mwa tasi a kota, kono na sepile Ngede.
Kikaho, Gingile habeya muwayo wahae wa kuzumisa mwa tasi a kota, hakubukanya buandilala ni kutumbula mulilo. Mulilo hase utuka hande, habeya kota yetelele yeomile mwahali a mulilo. Kota ye neizibahala hahulu kwa kuzusa musi womuñata hainze ituka. Hapahama kwa kota inge asweli kota yeo kwa mafelelezo ayona ka meeno.
Kasamulahonyana, autwa mulumo wa limuka zepatehile. Nelikena ni kuzwa mwa pakani ya kota mwa ngoma ya zona. Gingile anafitile kwa ngoma ya limuka, hakasheza kota mwa pakani. Limuka selizwa kumatela fande, inge linyemile. Se libaleha kakuli nelisalati musi kono nelisikaya cwalo inge lisika lumaka Gingile habutuku!
Limuka alizwile, Gingile sa kenya lizoho lahae mwa siyaleto. Hazusa linjango ze bukiti za linonsi, zenelotisa linonsi lelikambile mi lelitezi mafula. Habeya hande linjango mwa kakotani kana shimbile famaheta ahae ni kukala kutuluka kwa kota.
Zazi leliñwi, hasamulaho alisunda, Gingile hape autwa pizo ya linonsi ya Ngede. Ahupula linonsi lelitabusa mi aakufa kulatelela nyunywani hape. Hase atelezi Gingile kwa tuko a mushitu, Ngede ayema kuipumulisa mwa muluti wo munde wa kota ya miutwa. “Ahh,” Gingile anahana. “Ngoma ya limuka iswanela kuba mwa kota onamo.” Atumbula kalilo kahae kabubebe ni kukala kupahama, mi kota yezwa musi aibeya mwa hanu yahae. Ngede aina inge abuha.
Liñau li sikamuluma kale, Gingile atuluka kuzwa kwa kota kakuakufa. Ka kuakufa kwahae, ashuta mutai ni kuwela fafasi kamusindo omutuna mi akweta lisito. Acuñuta kabubebe mwanakonela. Kalitohonolo lahae, Liñau nelisali mwa buloko kuli limumatise. Ngede, Njolo ya linonsi, namukutiselize bumaswe bwahae. Mi ni Gingile naitutile tuto.
Cwale, bana ba Gingile habautwa likande la Ngede, baba ni likute ku kona kanyunywani ka. Nako kaufela habalafanga linonsi, babonanga kuli basiyela kwateni Njolo siemba sesituna sa njango ya linonsi.
