婆婆嘅香蕉
婆婆有個好靚嘅花園，種滿晒啲高粱，小米同埋木薯，但係咁多嘢入便最好嘅就係香蕉。婆婆雖然有好多孫仔孫女，但係我心入便知道佢最鍾意我㗎。佢時時都會請我嚟佢屋企玩，講啲小秘密俾我聽。但係有一個秘密佢從來都冇試過同我講，就係佢催熟香蕉嘅辦法。
有一日，我見到婆婆放咗一個巨大嘅草籃喺門外。我問婆婆呢個係攞嚟做咩嘢嘅，但係婆婆就單單話：“呢個係我嘅神秘籃仔。”喺籃仔一邊放咗幾隻香蕉葉，婆婆間中都會去翻轉啲葉幾下。我好好奇，就問婆婆：“呢啲葉係攞嚟做咩嘢嘅？”但係婆婆就單單話：“呢啲係我嘅神秘葉仔。”
我好好奇噉睇住婆婆、香蕉、香蕉葉仲有嗰個巨大嘅草籃。但係婆婆就打發咗我去媽咪嗰便幫手。我噅住婆婆就話：“俾我留响度睇吓啦！”但係婆婆就堅持話：“唔好咁硬頸啦，細蚊仔，照我講嘅去做啦。”我咪唯有走開嘞。
到我翻嚟嗰陣時，婆婆正坐喺外便唞吓，但係籃仔同香蕉都唔見咗晒啦！我就問婆婆：“籃仔去咗邊度呀？香蕉去咗邊度呀？仲有嗰啲......”但係婆婆就話：“佢哋都喺一個神秘嘅地方。”我太失望啦！
過咗兩日時間，婆婆就叫我由佢間房度攞佢支士的嚟俾佢。我一打開道門，就聞到咗朕熟香蕉嘅味道。原來婆婆嘅神秘籃仔就擺响佢間房度！上面𢫏咗條舊毛氈，我揭開條毛氈，大力聞住嗰朕香噴噴嘅味道。
婆婆嗌我嘅時候，嚇咗我一跳：“你喺度做緊乜嘢？快啲攞我支士的嚟。”我趕緊攞咗支士的出去俾婆婆。婆婆睇住我，就問：“你喺度笑緊乜嘢呀？”我噉先至意識到，我仲喺度因為發現咗呢個神奇嘅秘密而偷笑住。
第二日呢，婆婆嚟睇我媽咪，我又走到婆婆屋企去偷睇嗰啲熟香蕉。有一梳香蕉已經非常之熟嘞。我摘咗一條香蕉，收埋咗佢喺我條裙仔度。𢫏翻好個籃仔之後，我就走到間屋後便，偷偷噉食咗條香蕉：呢個絕對係我食過最好味嘅香蕉啦！
第二日，我趁婆婆喺花園度摘蔬菜嘅時候，又偷偷走入佢間房去睇嗰啲香蕉。啲香蕉差唔多全部都熟晒嘞。我就頂唔順誘惑啦，攞咗四條香蕉。我䟴高腳離開佢間房，就聽到婆婆喺度咳緊。我收埋啲香蕉喺條裙仔下底，好似乜都冇發生過噉就走開咗。
第二日係婆婆趁墟打市嘅日子。婆婆好早就起身，佢將成熟咗嘅香蕉同木薯運到墟場度去賣。我嗰日冇急住去睇佢，但係我知道，我冇可能永遠避住婆婆。
嗰日挨晚，我被老竇老母同埋婆婆叫咗過去。我知道佢哋點解搵我。嗰日晚上，當我上床瞓覺嘅時候，我知道我再又唔會偷嘢啦，唔偷婆婆嘅，唔偷老竇老母嘅，邊個啲嘢都唔可以再偷。
This story is brought to you by the Global African Storybook Project, an effort to translate the stories of the African Storybook Project into all the languages of the world.
You can view the original story on the ASP website here
