同嫲嫲一齊過暑假

奧東哥、阿皮尤同佢哋嘅爸爸一齊住喺城市度。佢哋非常之期待過暑假,因為嗰個時候佢哋唔使翻學,同埋佢哋仲可以去探嫲嫲。佢哋嘅嫲嫲住喺一條靠近好大片湖水嘅漁村度。

1

奧東哥同阿皮尤又要去探嫲嫲啦,佢哋非常之開心。前一晚,佢哋執好自己嘅行李,準備去漁村嘅旅程。佢哋嗰晚都瞓唔著,成晚都喺度討論呢個暑假。

2

第二日凌晨,佢哋坐住爸爸嘅車前往條漁村。佢哋路上開過高山,又見到好多野生動物,仲經過幾個茶園添。佢哋唱住歌計住路上車輛過時間。

3

過咗一排,細蚊仔都癐晒,就喺車度瞓著咗。

4

當佢哋到達條漁村嘅時候,爸爸將奧東哥同阿皮尤叫醒咗。佢哋發現佢哋嘅嫲嫲——尼亞·琴亞達——喺樹蔭度鋪咗塊薦,正坐喺度唞緊。喺當地嘅語言入便,呢個名字嘅意思係“琴亞達人民個女”。佢係一個堅強兼美麗嘅女人。

5

尼亞·琴亞達歡迎佢哋嚟到自己嘅屋企,同佢哋一齊好快樂噉唱歌跳舞。佢兩孫仔亦都好高興噉將佢哋由城市買翻嚟嘅禮物送俾佢。奧東哥同阿皮尤爭住要嫲嫲打開自己嘅禮物先。

6

尼亞·琴亞達打開咗禮物之後,用傳統嘅習俗敢祝福咗佢兩個孫仔。

7

奧東哥同阿皮尤走出去玩吓。佢哋喺外便追住蝴蝶同雀仔。

8

佢哋仲爬樹,跳入湖水,瀄起咗好多水花。

9

天黑咗之後,佢哋翻到嫲嫲屋企度食晚飯,但佢哋太癐嘞,仲未食完,就瞓著咗。

10

第二日,爸爸開車翻城市,兩個細蚊仔就留俾嫲嫲照顧。

11

奧東哥同阿皮尤幫手嫲嫲做家頭細務。佢哋幫嫲嫲打水,攞柴。佢哋仲幫嫲嫲由雞竇入便攞翻啲雞蛋,同埋喺花園度摘蔬菜。

12

尼亞·琴亞達教佢哋煮烏咖喱粟米粥,仲教佢哋點做同燒魚一齊食嘅椰子飯。

13

一日朝頭早,奧東哥幫嫲嫲去到牧場放牛,但係班牛就跑到咗隔籬農場度,農夫好嬲,就威脅咗奧東哥話,要沒收呢啲牛賠翻食咗嘅莊稼。由嗰日之後,奧東哥好小心,唔想再俾呢啲牛攪出事喇。

14

有一日,細蚊仔同尼亞·琴亞達一齊去集市度。嫲嫲有一個賣蔬菜、砂糖同番梘嘅檔位。阿皮尤好鍾意俾客仔報價,奧東哥就負責幫客仔打包。

15

大家收咗工之後,佢哋坐喺一齊飲奶茶,幫嫲嫲計吓今日賺到嘅錢。

16

但係假期好快就結束啦,細蚊仔要翻城市嘞。尼亞·琴亞達送咗頂帽仔俾奧東哥,送件冷衫俾阿皮尤。佢幫細蚊仔包咗啲嘢俾佢哋喺路上食。

17

當爸爸嚟接佢哋嘅時候,佢哋一啲都唔想走。細蚊仔噅住要尼亞·琴亞達同佢哋一齊翻去城市。但係佢笑住話:“我太老啦,唔適合住喺大城市度。我就喺呢條村度等你哋,等你哋下次再嚟啦。”

18

奧東哥同阿皮尤緊緊敢就抱住佢,同佢講拜拜。

19

當奧東哥同阿皮尤翻到學校時,佢哋將條村度嘅生活呢單嘢講咗俾班同學聽。有啲人覺得城市嘅生活好唔錯,另外仲有啲人覺得鄉下嘅生活更加好。最緊要嘅係,每個人都相信奧東哥同阿皮尤嘅嫲嫲真係好勁呀!

20

同嫲嫲一齊過暑假

文: Violet Otieno
圖: Catherine Groenewald
譯: dohliam
語言: 粵語

This story is brought to you by the Global African Storybook Project, an effort to translate the stories of the African Storybook Project into all the languages of the world.

You can view the original story on the ASP website here

Global ASP logo

Creative Commons License
This work is licensed under a Creative Commons Attribution 3.0 Unported License.